Home अहमदनगर संगमनेर: घराच्या भिंतीला दुचाकी धडकून अपघातात तरुण ठार

संगमनेर: घराच्या भिंतीला दुचाकी धडकून अपघातात तरुण ठार

December 21, 2023

Sangamner Accident: दुचाकीवरील नियंत्रण सुटल्याने दुचाकी उपरस्त्यालगतच्या एका भिंतीवर जाऊन धडकली. यामध्ये तरुणाचा जागीच मृत्यू.

संगमनेर: घारगाव येथील उपरस्त्यालगत घराच्या भिंतीला केटीएम दुचाकी धडकून १९ वर्षीय तरुणाचा जागीच मृत्यू झाल्याची घटना संगमनेर तालुक्यातील घारगाव येथे घडली. दुचाकीचेही मोठे नुकसान झाले. हा अपघात बुधवारी (दि. २०) सकाळी साडेसात वाजताच्या सुमारास झाला. या अपघातात पवन रोहिदास पवार (रा. हाडकी, आंबी खालसा) असे मृत झालेल्या तरुणाचे नाव आहे.

याबाबत मिळालेली माहिती अशी, पवन पवार हा युवक घारगाव येथील उपरस्त्याने बुधवारी सकाळी साडेसात वाजताच्या सुमारास केटीएम दुचाकीवरून (एम.एच. १७, सी.झेड. ८३४२) पुणेच्या दिशेने जात होता. त्याचे दुचाकीवरील नियंत्रण सुटल्याने दुचाकी उपरस्त्यालगतच्या एका भिंतीवर जाऊन आदळली. या अपघातात पवनचा जागीच मृत्यू झाला.

याबाबत पोलिसांना माहिती मिळताच सहायक फौजदार ए. आर. गांधले यांनी घटनास्थळी येऊन पंचनामा केला. मृतदेह संगमनेर येथील कुटीर रुग्णालयात पाठविण्यात आला. पुढील तपास सहायक फौजदार गांधले हे करीत आहेत.

Web Title: Accident A young man was killed in an accident when his bike hit the wall of the house