Home अहमदनगर अहमदनगर: अल्पवयीन मुलीला पळवून नेऊन अत्याचार

अहमदनगर: अल्पवयीन मुलीला पळवून नेऊन अत्याचार

September 18, 2023

Ahmednagar News: घरात झोपलेल्या अल्पवयीन मुलीला मध्यरात्री पळवून नेत तिच्यावर अत्याचार (abused) केल्याची घटना.

अहमदनगर: घरात झोपलेल्या अल्पवयीन मुलीला (वय 16) मध्यरात्री पळवून नेत तिच्यावर अत्याचार केल्याची घटना समोर आली आहे. तोफखाना पोलिसांनी मुलीसह तिला पळवून नेणार्‍याला ताब्यात घेतले आहे. मुलीचा जबाब नोंदविण्यात आला असून पोलीस ठाण्यात भादंवि कलम 363 प्रमाणे दाखल असलेल्या गुन्ह्यात वाढीव अत्याचार, पोक्सोचे कलम लावण्यात आले आहेत.

याबाबत अधिक माहिती अशी की, गुरूवारी (दि. 14) रात्री 11 ते शुक्रवारी (दि. 15) पहाटे अडीचच्या सुमारास नगर शहरातील एका उपनगरातून एका अल्पवयीन मुलीला अज्ञात व्यक्तीने पळवून नेले होते. ती घरात झोपलेली असताना मुलीला पळवून नेल्याची फिर्याद तिच्या आजोबाने तोफखाना पोलीस ठाण्यात शुक्रवारी दुपारी दिली होती. पोलिसांनी भादंवि कलम 363 नुसार गुन्हा दाखल केला होता. दरम्यान, मुलीसह तिला पळवून नेणार्‍याचा तोफखाना पोलिसांकडून शोध सुरू होता. ते दोघे मिळून आले आहेत.

आशिष कुंडलिक निकाळजे (रा. बोल्हेगाव) असे पळवून नेणाऱ्या आरोपीचे नाव आहे. पोलिसांनी मुलीचा जबाब नोंदवून घेतला असून तिच्यावर अत्याचार झाल्याचे समोर आले आहे. निकाळजे याने पीडित मुलीला तिच्या घरातून पळवून नेले. ते येथून मनमाड व पुढे प्रयागराज (उत्तरप्रदेश) येथे गेले होते. पोलिसांनी निकाळजे याला ताब्यात घेतले असून त्याच्यावर वाढीव अत्याचार, पोक्सो कलमान्वये गुन्हा दाखल करण्यात आला आहे. पुढील तपास सहा.पोलीस निरीक्षक विश्वास पावरा करीत आहेत.

Web Title: minor girl was abducted and abused