Home महाराष्ट्र पोलीसच असुरक्षित, पोलिसाच्या घरावरच चोरांचा डल्ला, बंदूक आणि काडतुसे गायब

महाराष्ट्र

पोलीसच असुरक्षित, पोलिसाच्या घरावरच चोरांचा डल्ला, बंदूक आणि काडतुसे गायब

December 27, 2023

Crime News: पोलिसाच्या घरावरच चोरट्यांनी डल्ला मारल्याची घटना समोर.

नागपूर: पोलिसाच्या घरावरच चोरट्यांनी डल्ला मारल्याची घटना समोर आली आहे. चोरट्यांनी पोलिसाच्या घरात घुसून बंदूक, काडतुसे गायब केले आहेत. या पोलीस वसाहतीत घडलेल्या या घटनेची चर्चा संपूर्ण शहरात रंगली आहे.

पोलीस कर्मचारी मंगेश लांजेवार यांच्या घरात ही चोरी झाली आहे. नागपुरात राज्य राखीव दलाच्या कमांडंटचे गनमॅन असलेल्या मंगेश यांच्या बंदुकीच्या ३० गोळ्यांसह पिस्तूल चोरीला गेले आहे. धक्कादायक म्हणजे, ही चोरी पोलीस वसाहतीतील कर्मचाऱ्याच्या घरात घुसून करण्यात आली आहे. त्यामुळे नागरिकांच्या मालमत्तेचे संरक्षण करण्याची जबाबदारी असलेल्या पोलिसांनाच चोर थेट आव्हान देत असल्याचे चित्र आहे.

राज्य राखीव पोलीस दलातील कार्यरत असलेले मंगेश लांजेवार हे पोलीस वसाहतीत राहतात. साप्ताहिक सुट्टी असल्याने मंगेश हे भंडारा येथे गेले होते. बाहेर जाताना त्यांनी पिस्तूल आणि ३० जिवंत काडतुसे घरातच ठेवली होती.

चोरट्यांनी मंगेश यांच्या घराचे कुलूप तोडून घरात प्रवेश केला. त्यानंतर घरातील कपाटाचेही कुलूप तोडले आणि पिस्तूल- काडतुसे चोरुन नेली. मंगेश पुन्हा नागपूरला परतल्यावर घराच्या दरवाजाचे कुलूप तुटलेले दिसले.

घरात गेल्यावर बंदूक आणि काडतुसे गायब असल्याचे त्यांच्या निदर्शनास आले. याप्रकरणी एमआयडीसी पोलीस स्टेशनमध्ये घरफोडीचा गुन्हा दाखल करण्यात आला आहे. अधिक तपास पोलीस करीत आहे.

Web Title: Theft racket, gun, and cartridges disappeared from the police house itself