Home Accident News अज्ञात वाहनाच्या धडकेत दुचाकीवरील दोन युवकांचा मृत्यू

अज्ञात वाहनाच्या धडकेत दुचाकीवरील दोन युवकांचा मृत्यू

September 19, 2023

Ahmednagar News: अज्ञात वाहनाने दुचाकीला दिलेल्या धडकेत (Accident) काष्टी येथील पुनर्वसन वसाहतीत राहणाऱ्या दोघा युवकांचा जागीच मृत्यू.

श्रीगोंदा: अहमदनगर-दौंड राष्ट्रीय महामार्गावरील मढेवडगाव (ता.श्रीगोंदा) शिवारात मलिकजवळ अज्ञात वाहनाने दुचाकीला दिलेल्या धडकेत काष्टी येथील पुनर्वसन वसाहतीत राहणाऱ्या दोघा युवकांचा जागीच मृत्यू झाला. ही घटना सोमवारी (दि. १८) रात्री सातच्या सुमारास घडली.

आकाश ज्ञानेश्वर ढगे (वय १९), सचिन नितीन ठुबे (वय १८, दोघेही रा. काष्टी, ता.श्रीगोंदा) अशी अपघातातील मृत युवकांची नावे आहेत. सोमवारी रात्री सातच्या सुमारास आकाश ढगे व सचिन ठुबे हे दोघे दुचाकीवरून काष्टीकडे चालले होते. मढेवडगाव शिवारातील दावल मलिकजवळ अज्ञात वाहनाने दोघा युवकांच्या दुचाकीला धडक दिली. अपघाताचे वृत्त समजताच, श्रीगोंदा दावल बाजार समितीचे संचालक अॅड. महेश दरेकर यांनी अपघातस्थळी धाव घेतली. मात्र, अपघातात दोघांचाही जागीच मृत्यू झाला. आकाश व सचिन हे आई-वडिलांना एकुलते एक मुले होते. त्यामुळे आई-वडील, नातेवाइकांचा आक्रोश हेलावून टाकणारा होता. मित्रांनाही अश्रू अनावर झाले. नगर-दौंड राष्ट्रीय महामार्गावर मोठ्या प्रमाणावर वाहतूक वाढली आहे. त्यामुळे अपघातांचे प्रमाणही गेल्या काही दिवसांपासून वाढले आहेत. या रस्त्यावर दुभाजक नाहीत. त्यामुळेही असे अपघात वारंवार होत आहेत.

Web Title: Two youths on a two-wheeler died in a collision with an Accident