अल्पवयीन मुलीवर सामूहिक अत्याचार; चिमुकली पाच महिन्यांची गर्भवती
Beed Crime News : अल्पवयीन मुलीवर सामूहिक अत्याचाराची घटना घडल्याचे समोर. मासिक पाळी बंद झाल्याने घटना उघडकीस.
बीड: बीड तालुक्यातील पिंपळनेर पोलीस ठाणे हद्दीत अल्पवयीन मुलीवर सामूहिक अत्याचाराची घटना घडल्याचे समोर आलंय. याप्रकरणी चार आरोपीं विरोधात पिंपळनेर पोलीस ठाण्यात गुन्हा दाखल करण्यात आलाय. पिंपळनेर परिसरातील एका गावातील सतरा वर्षीय मुलीवर चार युवकांनी वेळोवेळी वेगवेगळ्या ठिकाणी लैंगिक अत्याचार केला. या घटनेमुळे संपूर्ण जिल्ह्यात एकच खळबळ उडाली असून या प्रकरणी आता पोलिसांनी चार जणांविरोधात गुन्हा दाखल करत पुढील तपास सुरू केला आहे.
पीडितेच्या तक्रारीनुसार, आरोपींनी ओळखीचा गैरफायदा घेत बळजबरीने शारीरिक अत्याचार केला. या आरोपींमध्ये करण साळवे, वैभव यादव, लखन कांबळे आणि दशरथ ढगे यांचा समावेश आहे. अत्याचारानंतर पीडितेला धमकावून गप्प ठेवले जात होते. मात्र पीडितेची मासिक पाळी बंद झाल्याने तीची चाचणी केली असता तिची गर्भधारणा झाल्याचं समोर आलंय. दरम्यान, एका खाजगी रुग्णालयात तपासणी केल्यानंतर गर्भाला पाच महिने झाल्याचे निष्पन्न झाले.
धक्कादायक बाब म्हणजे, आरोपींच्या नातेवाईकांनी गर्भपातासाठी दबाव आणल्याचेही फिर्यादीत नमूद केलं आहे. याप्रकरणी पिंपळनेर पोलीस ठाण्यात विविध कलमान्वये गुन्हा नोंदविण्यात आलाय. या प्रकरणाचा पोलीस सध्या अधिक तपास करत आहेत. दरम्यान या घटनेने परिसरात एकच खळबळ उडालीय.
Breaking News: Beed Gang rape of a minor girl
