संगमनेरात एक कोटी रुपयांची रक्कम घेऊन जाणारी कार पकडली

Breaking News | Sangamner: निवडणूक आयोगाच्या भरारी पथकाने तब्बल एक कोटी रुपयांची रक्कम घेऊन जाणारी कार पकडली.

संगमनेर:  शहराजवळ असलेल्या खांडगाव फाटा येथे शनिवारी (दि.15) दुपारी निवडणूक आयोगाच्या भरारी पथकाने तब्बल एक कोटी रुपयांची रक्कम घेऊन जाणारी कार पकडली. सदर रक्कम एका मोठ्या ठेकेदाराची असल्याचे समजते. याबाबत संगमनेर शहर पोलिसांकडून मिळालेल्या प्राथमिक माहितीनुसार, कार (क्रमांक एमएच.25, एएस.8851) ही धाराशिव येथून रक्कम घेऊन पुण्याकडून संगमनेरच्या दिशेने येत होती.

कारमध्ये मोठ्या प्रमाणात रक्कम असल्याची माहिती निवडणूक आयोगाच्या स्थायी सर्वेक्षण पथकाला गोपनीयरीत्या मिळाली होती. यानंतर पथकाने खांडगाव फाट्यावर सापळा रचून ही कार अडवली. तपासणीमध्ये एक कोटी रुपये रोख रक्कम आढळून आली. प्राथमिक माहितीनुसार ही रक्कम एका मोठ्या ठेकेदाराची असल्याचे समजते.

या घटनेची माहिती मिळताच शहराचे पोलीस निरीक्षक समीर बारवकर, पोलीस उपनिरीक्षक श्रीकांत सावंत यांनी तातडीने घटनास्थळी धाव घेतली. त्यांनी भरारी पथकासोबत मिळून पंचनामा करून संबंधित रक्कम आणि कार ताब्यात घेतली. याबाबत पोलीस अधिक तपास करत आहे.

ज्या कारमधून हे रुपये जप्त केली ती कार नाशिक-पुणे महामार्गाने रायतेवाडी फाटा येथून जुन्या नाशिक-पुणे महामार्गावरून संगमनेर शहराच्या दिशेने येत होती. कारमधील ही रक्कम धाराशिव येथील दोन बांधकाम कंपन्यांची (कन्स्ट्रक्शन कंपनी) आहे. सध्या निळवंडे धरणाच्या कालव्यांची कामे सुरू आहेत. या कामावर असलेल्या कामगारांचे पगार देण्यासाठी ही रक्कम नेली जात होती, असे प्राथमिक चौकशीत निषन्न झाले, असे पोलिस निरीक्षक बारवकर यांनी सांगितले.

Breaking News: Car carrying Rs 1 crore seized in Sangamner