आईच्या हातातून बिबट्याने चार वर्षीय मुलाला पळवून नेऊन केले ठार

October 30, 2020

पाथर्डी | Pathardi: पाथर्डी तालुक्यात बिबट्याने हाहाकार घातला आहे. गेल्या पंधरा दिवसांत काल ही तिसरी घटना घडली आहे. तालुक्यातील शिरपुरच्या पानतासवाडी शिवारात गुरुवारी सायंकाळी सात वाजेच्या सुमारास आईच्या हातातील चार वर्षीय मुलाला बिबट्याने पळवून नेऊन ठार केल्याची घटना घडली आहे.

सार्थक संजय बुधवंत वय ४ असे या मयत मुलाचे नाव आहे. शिरपुरच्या पानतासवाडी शिवारात तारकनाथ वस्ती येथे संजय बुधवंत राहतात. गुरुवारी सायंकाळी सार्थकाची आई त्याला अंगणात घेऊन उभी होती. त्यावेळी दबा धरून बसलेला बिबट्याने आईच्या हातातील मुलाला हिसकावून पळवून नेले. आईने प्रतिकार केला मात्र त्याचा काही उपयोग झाला नाही. तिने आरडाओरडा केल्याने आजूबाजूचे लोक तेथे धावून आले. त्यानंतर ग्रामस्थ, वनाधिकारी यांनी पाच किलोमीटरचा परिसरात पिंजून काढला. अखेर अडीच तासांच्या शोधानंतर सटवाई दरा येथे रक्त आढळले. रात्री उशिरापर्यंत सार्थकची शोध मोहीम सुरु होती.